வல்வையூரா நின் பணி துணிவோடு அணிசேர்த்து தொடரட்டும் - நீ.வர்ணன் (Valvettithuraiorg 1 வருடம் பூர்த்தி)

(Valvettithuraiorg 1 வருடம் பூர்த்தி)

வல்வையூரா நின் பணி துணிவோடு அணிசேர்த்து தொடரட்டும்

அகவை ஒன்றினை கொண்டாடும் www.valvettithurai.org  க்கு எனது இதயபூர்வமான வாழ்த்துக்கள்.ஈழத்து மண்ணின் வடபுலம்பால் அமைந்த எமது வல்வை மண் எத்தனையோ துறைகளுக்கு சிறந்து விளங்கியிருந்தமை யாவருமறிந்த  உண்மை.

இலங்கைக்கு பின்னர் சுதந்திரம் பெற்ற சிங்கப்பூர் இலங்கையை விடவும் பலமடங்கு அபிவிருத்தி அடைந்திருப்பதை போலவே எமக்கு பின்னர் பலதுறைகளில் தடம்பதித்தவர்கள் இன்று அத்துறைகளில் சிறந்து விளங்குவதை காணமுடிகின்றது.

இதன் பின்புலம் ஆராய்கின்றபொழுது நாம் நவீனத்தை எமது துறைகளில் உள்வாங்காமையும் நம் முன்னேற்றத்துக்கு தடையாக இருப்பதை அறிய முடிகின்றது.அன்னபூரணியை அமெரிக்கா வரை கொண்டு சென்ற நாங்கள் இன்று ஒரு சிறு படகு செய்யக்கூட அண்டை ஊர்களை நாடுவது இதற்கு ஒரு சான்று.

எனினும் இணைய ஊடகம் எனும் நவீனத்தை நாங்கள் தொட்டிருப்பது எமக்கு மகிழ்ச்சியளிக்கும் விடயமாகும். போராட்டங்களுக்கு சொந்தக்காரர்கள் சொந்த ஊரில் வசிப்பது அரிதான காரியம். ஆனால் அவ்வாறு புலம்பெயர்ந்தவர்களுக்கு தன் மண்ணைப்பற்றி தொடர்ச்சியாக அறிவதற்கு உதவியாக இருக்கும் www.valvettithurai.org வலைத்தளத்தின் பணிகள் பாராட்டப்படவேண்டியது அவசியம்.

அண்மைய தசாப்தத்தில் எத்தனையோ இணையத்தளங்கள் தமிழில் தொடங்கப்பட்டமை தமிழர் நடப்புக்களை உலகறிய செய்வதில் பெரும் பங்காற்றியிருந்தது. எனினும் பெரும்பாலான தளங்கள் புலம்பெயர் உறவுகளால் நடாத்தப்பட்டமையினால் இலங்கையின் உள்ளக சூழலை, அன்றாட நிகழ்வுகளை சரியாக வெளிக்கொணர்வதில் இணையத்தளங்கள் பத்திரிகைகளிடம் தோற்றுவிட்டன என்றால் தகும்.

இவ்வாறான காலகட்டத்தில் வல்வை மண்ணை, என் ஊர் நிகழ்வுகளை உலகறிய செய்யவேண்டும் என்ற நோக்கத்தோடு தொடங்கப்பட்ட இந்த வல்வெட்டித்துறை.org இணையத்தளம் வல்வை நிகழ்வுகளை வெளிக்கொணர்வதில் வெற்றி பெற்றிருக்கின்றது என்பது ஆராய்ந்தறியப்பட்ட உண்மை.

ஏனெனில் உள்ளூரில் இருந்துகொண்டு உள்ளூர் நிகழ்வுகளையும் இந்த மண்ணின் சிறப்புக்களையும் செய்திகளையும் வெளிக்கொணரும் ஒரு சில ஊடகங்களில் வல்வையின் இணையத்தளம் ஒன்று ஒரு வருடத்தில் இந்த வளர்ச்சியை அடைந்திருப்பது எம் அனைவருக்கும் பெருமை தரும் விடயமாகும்

இன்றைய சந்ததியினுடைய கணணியுக வளர்ச்சி காரணமாக, சைக்கிளை எடுத்துச்சென்று கடையில் பத்திரிகை வாங்கி வந்து படிப்பதை விட வீட்டிற்குள் இருந்துகொண்டு இணைய செய்திகளை வாசிப்பதில் அதிக ஆர்வம் காட்டப்படுவது பத்திரிகை விற்பனையின் புள்ளிவிபரங்களை எடுத்துப்பார்த்தால் புரியும். தனது பக்கத்து வீட்டு நிகழ்வை கூட சமூக இணையமூடாகவே அறிகின்ற இளம் சந்ததி இப்பொழுது இலங்கையிலும் உருவாகிவிட்டது.

எனவே தக்கன பிழைக்கும் என்ற சார்ள்ஸ் டார்வினுடைய கூர்ப்பு கொள்கைக்கு ஒப்பாக நாம் இந்த இளம் சந்ததியிடத்தில் எமதூர் சிறப்புக்களை எடுத்து செல்ல வேண்டும் என்றால் கால மாற்றத்திற்கு ஏற்றாற்போல் இணைய ஊடகத்தில் நாம் வெற்றிபெற வேண்டியது அவசியமாகும். எமது வல்வையை எடுத்துக்கொண்டால் கூட சந்திகளில் சைக்கிள்களில் நிற்கும் இளைஞர்களில் எண்ணிக்கை அருகி கணணிமுன் அமர்ந்திருக்கும் இளைஞர்களின் எண்ணிக்கை அதிகரித்திருப்பது கண்கூடான உண்மையாகும்.

இப்படியான ஒரு சூழலிலில் இந்த வல்வெட்டித்துறை.org இணையத்தளத்தை அன்றாட நிகழ்வுகளின் தரவேற்றத்தோடு மிகச்சிறப்பாக நடாத்திவரும் அனைவருக்கும் எனது தனிப்பட்ட பாராட்டுக்களை தெரிவித்துக்கொள்கின்றேன்.

என் ஊரின் ஒவ்வொரு பாகத்தை பற்றியும் உள்ளூர் நடப்புக்களை பற்றியும் அறிய உதவியாக இருக்கும் இந்த தளம் இன்னும் வாழவேண்டும் வளரவேண்டும் என்பது எனது அவாவாகும். இதன் பின்னணியில் செயற்பட்டுக்கொண்டிருக்கும் அணியினரை ஊக்குவிக்க வேண்டியது வல்வையில் பிறந்த ஒவ்வொருவரதும் கடமையாகும்.

எமது வல்வையின் இணையததளம் இன்னும் பிரகாசிக்க வேண்டும். இன்றுபோலவே என்றும் அவர்களின் உற்சாகம் தொடரவேண்டும் என்று முகாமைத்துவத்துக்கும் செயலணியினருக்கும் இச்சிறியோனின் வாழ்த்துக்களை தெரிவித்துக்கொள்கின்றேன். யாம் வல்வையராய் இருப்பதில் பெருமைகொள்வதில் நீவிரும் ஒர் காரணம் நின் பணி துணிவோடு அணிசேர்த்து தொடரட்டும்.