பொலிகண்டி செம்மீன் வி.கழக 1ஆம் ஆண்டு விழா, சாகச விளையாட்டுக்களும் இடம்பெற்றன
பிரசுரிக்கபட்ட திகதி: 26/07/2014 (சனிக்கிழமை)
பொலிகண்டி செம்மீன் விளையாட்டுக் கழகத்தின் 1வது ஆண்டு நிறைவை முன்னிட்டு அவ் விளையாட்டுக் கழகத்தினால் பல்வேறு சாகஸ விளையாட்டு நிகழ்வுகள் பொலிகண்டி மேற்கு ஊறணி குடியேற்ற பகுதியில் இன்று காலை இடம்பெற்றன, இதனைத்தொடர்ந்து நாளையும் கழக வீரர்களின் சாகஸ நிகழ்வுகளும் வெளிக் கழகங்களுக்கிடையிலான போட்டிகளும் இடம்பெறவுள்ளது.
இன்று காலை இடம்பெற்ற கழக வீரர்களின் சாகஸ மற்றும் வெளிக் கழகங்களுக்கிடையிலான போட்டிகளின் வரிசையில், பருத்தித்துறை நகர புகழ்பெற்ற சான்டோ ஆ.துரைரத்தினம் அவர்களால் பயிற்றுவிக்கப்பட்ட செம்மீன் விளையாட்டுக் கழக வீரர் கணேசமூர்த்தி கவிந்திரன் (யோகன்) அவர்களின் நெறிப்படுத்தலின் கீழ் கழக வீரர்களின் மயிர் கூச்செறியச்செய்யும் வீர தீர சாகஸ நிகழ்வுகளாக, டிராக்டர், லொறி, வான், மினி வான், சின்ன வட்டா, போன்ற வாகனங்களை கழக வீரர்களால் தலைகளில் கட்டி இழுக்கப்பட்டது.
மேலும் 9 குதிரைவலுக் கொண்ட எதிர் எதிரே செல்லும் இரண்டு விசைப்படகுகளை கைகளால் கட்டி நிறுத்துதல் போன்ற சாகஸ நிகழ்வுகள் இடம்பெற்றன. அதனைத்தொடர்ந்து வெளிக் கழகங்களுக்கிடையிலான போட்டிகளாக மோட்டார் படகு ஓட்டப் போட்டி, கட்டுமரம் வலித்தல் போட்டி, தம்பதிகளுக்கான சைக்கிள் ஓட்டப்போட்டி மற்றும் வினோத உடைப் போட்டி என்பன நடைபெற்றன.
இன்று மாலை இடம்பெற்ற நிகழ்வுகளாக செம்மீன் விளையாட்டுக் கழக வீரர் வீராங்கனைகளுக்கான போட்டிகள் நடைபெற்றன. இரண்டாம் நாள் நிகழ்வுகளின் வரிசையில் காலையில் வெளிக் கழக ஆண் மற்றும் பெண்களுக்கான மரதன் ஓட்டப் போட்டி இடம்பெறவுள்ளது. அதனைத்தொடர்ந்து மாலையில் வெளிக் கழகங்களுக்களுக்கான கிறிஸ் கம்பம் ஏறுதல், தலையணைச் சண்டை, சாப்பாட்டுப் போட்டி மற்றும் கழகங்களுக்கிடையிலான கயிறிழுத்தல் போன்ற போட்டிகளும் இடம்பெறவுள்ளது.
Comments will be edited (grammar, spelling and slang) and authorized at the discretion of Valvettithurai.org. The website also has the right not to publish selected comments.
எமது செய்திகளின் மறுபதிப்பினை எவரும் செய்ய முடியும், ஆனால் குறித்த எமது செய்திகளில் எதுவித மாற்றமும் செய்யாமல், எமது இணையதளத்தின் (www.valvettithurai.org) பெயரினைக் கண்டிப்பாக குறிப்பிடுதல் வேண்டும்.
