வல்வையிலும் நடிகனுக்கு கட்அவுட் - சமூக வலைத்தளங்களில் கடுந்தாக்கு

'வீரத்துக்கும் தியாகத்திற்கும் பெயர் போன வல்வெட்டித்துறை மண்ணில் - பிரபாகரன் பிறந்த மண்ணில் - நடிகனுக்கு கட் அவுட்டா' எனத் தாங்கிய செய்தி ஒன்று இலங்கைத் தமிழர் சார் சமூக வலைத் தளங்களில் பரவலாக நேற்று முதல் பதிவேற்றப்பட்டுவருகின்றது.

இந்தியாவில் அதிலும் குறிப்பாக தமிழகத்தில் உலாவிவரும் நடிகர்களுக்கான அர்த்தமற்ற கட் அவுட் கலாச்சாரத்தை இங்கும் இளைஞர்கள் பின்பற்றத் தொடங்குவதில் பலருக்கும் ஏற்பட்டுள்ள ஆதங்கத்தின் வெளிப்பாடாகாவே மேற்குறித்த செய்தி பரவி வருகின்றது.

நடிகர் விஜய் இனுடைய 'மெர்சல்' திரைப்படம்' வரும் தீபாவளி அன்று திரையிடப்படவுள்ள நிலையில், வல்வெட்டித்துறை சந்தியில் அமைக்கப்பட்டுள்ள கட் அவுட்டினை கீழே படத்தில் காணாலாம். 

2009 உள்நாட்டு யுத்தத்தின் பின்னர், யாழில் இது போன்ற கட் அவுட் கலாச்சாரம் ஆங்காங்கே குறிப்பாக யாழ் நகரில் தலை தூக்கியிருந்த போதும், சமய மற்றும் கலாச்சார கட்டுப்பாடுகள் நிறைந்திருந்த வல்வெட்டித்துறையில் இது போன்ற சம்பவம் நடைபெற்றுள்ளமை இதுவே முதற்தடவை என்பது இங்கு குறிப்பிடத்தக்கது.