கணபதி படிப்பகத்தின் 46 ஆவது ஆண்டு விழாவும் பாலர் தின நிகழ்வும் நேற்று சிறப்பாக நடைபெற்றது

வல்வெட்டித்துறை நெடியகாடு கணபதி படிப்பகத்தின் 46 ஆவது ஆண்டு விழாவும் பாலர் தின நிகழ்வும் இன்று சிறப்பாக நடைபெற்று சற்று நேரத்திற்கு முன்னர் நிறைவுபெற்றது.

 

இன்று மாலை 04.30 மணியளவில் வல்வை மகளீர் மகா வித்தியாலய மண்டபத்தில் நடைபெற்ற விழா 10.30 மணிவரை நீடித்திருந்தது.

 

கணபதி படிப்பகத்தின் தலைவர் திரு.ச.ஜெயகணேஷ்  தலைமையில் நடைபெற்ற இந் நிகழ்விற்கு பிரதம விருந்தினராக திரு.S.தில்லைநாதன் (உதவிப் பணிப்பாளர், முன்பள்ளி வடமராட்சி வலயம்) அவர்களும் சிறப்பு விருந்தினராக திரு.ந.அனந்தராஜ் (தவிசாளர், வல்வை நகரசபை) அவர்களும் கலந்து சிறப்பித்திருந்தார்கள்.

 

விழாவின் விருந்தினர்கள், வல்வெட்டித்துறை நெடியகாடு திருச்சிற்றம்பல பிள்ளையார் ஆலய வீதி முன்றலிலிருந்து கணபதி பாடசாலை பாலகர்களின் பாண்ட் வாத்திய அணி வகுப்புடன் வல்வை மகளீர் மகா வித்தியாலய   பாடசாலை மண்டபத்திற்கு அழைத்துவரப்பட்டிருந்தார்கள்.

 

பாலகர்களின் ஆடல், பாடல், நடனம் மற்றும் பேச்சு (தமிழ், ஆங்கிலம்) ஆகிய நிகழ்ச்சிகளுடன், பழைய மாணவர்களின் நிகழ்ச்சி மற்றும் நெடியகாடு கணபதி மின் அமைப்பாளர்களின் மின் நடனம் ஆகியன கலை நிகழ்வை அலங்கரித்தன. அத்துடன் பாலகர்களுக்கு பரிசில்களும் வழங்கப்பட்டன.

 

விழாவில் நடைபெற்ற பல்வேறு கலைநிகழ்வுகளைத் தொடர்ந்து, பேச்சாளர்களின் உரைகளில் கணபதி படிப்பகத்தின் வளர்ச்சி பற்றி பிரஸ்தாபிக்கப்பட்டிருந்தது. 

 

வல்வையில் தொடர்ந்து சிறப்பாக இயங்கி வரும் படிப்பகங்களில் கணபதி பதிப்பகமும் ஒன்று என்பது குறிப்பிடத்தக்கது.

 

இது பருத்தித்துறை - காங்கேசந்துறை வீதியில், வல்வெட்டித்துறை நெடியகாடு திருச்சிற்றம்பலப் பிள்ளையார்  ஆலய முன்றலில் அமைந்துள்ளது குறிப்பிடத்தக்கது.