இன்று அதிகாலை ஒரு மணிவரை நீடித்திருந்த கலைவிழா, வர்ணம் குறும் படமும் திரையிடப்பட்டது – முழுப் படத்தொகுப்பும் இணைப்பு

வல்வை கலை கலாச்சார  இலக்கிய மன்றத்தின் 4வது கலை இலக்கியப் பெருவிழா நேற்று பிற்பகல் 03.30 மணியளவில்ஆரம்பமாகி இன்று அதிகாலை சுமார் ஒரு மணிவரை மிகவும் சிறப்பாக நடைபெற்றது.

 

நிகழ்வின் இறுதியில் வல்வை கலை கலாச்சார  இலக்கிய மன்றத்தின் இரண்டாவது குறும் திரைப் படமான வர்ணம் திரையிடப்பட்டிருந்தது.

 

வல்வெட்டித்துறையில் வல்வை கலை கலாச்சார  இலக்கிய மன்றத்தால் வருடம்தோறும் நடாத்தப்பட்டு வரும் கலை நிகழ்ச்சிகள் நேற்று பிற்பகல் 03.30 மணியளவில் ஆரம்பமாகியது. நிகழ்வில் முதலில் பிரதம விருந்தினர்கள் வல்வைச் சந்தியில் இருந்து நெடியகாடு திருச்சிற்றம்ப பிள்ளையார் வீதியில் அமைந்திருக்கும் பிரதான அரங்கிற்கு, மேளதாள வாத்தியம், சிறார்களின் நடன, காவடி ஆட்டங்களுடன் அழைத்து செல்லப்பட்டார்கள்.

 

இக் கலை இலக்கிய விழா வல்வை கலை கலாசார இலக்கிய மன்றத்தின் தலைவர்  ர .மகிந்தன் அவர்கள் தலைமையில்  நிகழ்விற்கு பிரதம விருந்தினராக பேராசிரியர் கலாநிதி N. சண்முகலிங்கன் (துணைவேந்தர், சமூகவியற் பேராசிரியர், சமூகவியற்துறை யாழ் பல்கலைக்கழகம்) அவர்களும்,  சிறப்பு விருந்தினராக திரு.பா .மீனாட்சி சுந்தரம் (சமாதான நீதவான், வல்வை ஆவணக் காப்பக காப்பாளர் )அவர்களும்,திரு.சி.சிவபாலசிங்கம் ( முன்னாள் கிராம சேவையாளர் ஜ/393, பொலிகண்டி மேற்கு ) அவர்களும், வட மாகாண சபை உறுப்பினர் திரு.M.K. சிவாஜிலிங்கம் அவர்களும் கலந்து சிறப்பித்தார்கள்.

 

பிரதம விருந்தினர் மற்றும் சிறப்பு விருந்தினர்களினால் மங்கள விளக்கேற்றும்  நிகழ்வினைத்தொடர்ந்து அக வணக்கம், இறைவணக்கம், தமிழ் தாய் வாழ்த்துக்களுடன் ஆரம்பமாகியது.

 

வரவேற்புரையைத் தொடர்ந்து சிவஸ்ரீ சோ.தண்டபாணிக்க தேசிகர் (பிரதம குரு வல்வை ஸ்ரீ முத்துமாரி அம்மன் தேவஸ்தானம் ) அவர்கள், அருட்திரு கா. நிரூபன் நிஷாந்த் (புனித செபஸ்தியார் ஆலய பங்குத் தந்தை வல்வெட்டித்துறை) ஆகியோரால் ஆசியுரை நிகழ்த்தப்பட்டது.

 

தலைவர் உரையினைத்தொடர்ந்து நெய்தல் மலர் 4 வது இதழ் வெளியிடப்பட்டது. கலை கலாச்சார மன்றத்தினால் நடாத்தப்பட்ட கலை இலக்கிய போட்டிகளில் வெற்றி பெற்ற மாணவர்களுக்கு விருது வழங்கும் நிகழ்வு நடைபெற்றது.

 

அதனைத்தொடர்ந்து திரு பொ. வல்லிபுரம் அவர்களுக்கு "வல்வை கலைச்சிகரம் -2014 ஆம் ஆண்டிற்கான விருது வழங்கப்பட்டு கெளரவிக்கப்பட்டது. பிரதம விருந்தினர்களின் உரை நிகழ்த்தப்பட்டது.

 

சுமார் 06.00 மணியளவில் கலை நிகழ்ச்சிகள் ஆரம்பமாகியிருந்தன. இதில் தனி நடனம், குழு நடனம், கலை கலாசார இலக்கிய மன்ற இசை வகுப்பு மாணவர்களின் இசை நிகழ்ச்சி, நெடியகாடு பாரத சுரபி நாட்டிய கலாமன்ற மாணவிகளின் நடனம், நாடகம் என்பன இடம்பெற்றிருந்தன.

 

கம்பிகளின் மொழி ஆசிரியர் பிறேம் குமார் அவர்களினால் உருவாக்கப்பட்டு , இளங்கதிர்  கலா மன்றத்தினால் வழங்கப்பட்ட" அறவிட முடியா வட்டியும் அறுந்து விட்ட வாழ்க்கையும்" என்னும் நாடகமும்,வல்வை ஹெலியன்ஸ் நண்பர்கள் வழங்கிய "சாப விமோசனம்" எனும் சரித்திர நாடகமும், வல்வெட்டித்துறை கலை கலாசார இலக்கிய மன்றம் வழங்கிய "அக்கினிப் பெருமூச்சு " எனும் சமூக நாடகம்    மேடை ஏற்றப்பட்டது.

 

கலை இலக்கிய மன்றத்தின் 2வது தயாரிப்பான "வர்ணம்" குறும்படம் திரையுடப்பட்டது. இந்நிகழ்ச்சிகள் யாவும் சுமார் 01.00 மணியளவில் நிறைவடைந்தது.  இந்நிகழ்ச்சிகளைக் காண்பதற்கு பொதுமக்கள் பெருமளவில்  கலந்து கொண்டிருந்தமை குறிப்பிடத்தக்கது.