பருத்தித்துறை பிரதேச மட்ட மென்பந்தாட்டம் , வல்வை இறுதி ஆட்ட வாய்ப்பை வீனஸ் அணியிடம் இழந்தது

2014 ஆம் ஆண்டுக்கான பருத்தித்துறை பிரதேச மட்ட பதிவு செய்யப்பட்ட கழகங்களுக்கிடையிலான விளையாட்டுப் போட்டிகளின் வரிசையில் இன்று கழகங்களுக்கிடையிலான மென்பந்தாட்ட போட்டியானது வல்வெட்டித்துறை நெடியகாடு விளையாட்டு கழக மைதானத்திலும் பருத்தித்துறை வீனஸ் விளையாட்டுக் கழக மைதானத்திலும் இரு பிரிவுகளாக நடைபெற்றது.

 

முதலாவதாக நடைபெற்ற ஆட்டத்தில் பருத்தித்துறை உதயசூரியன் விளையாட்டுக் கழகத்தை எதிர்த்து வல்வை விளையாட்டுக் கழகம் மோதியது. முதலில் துடுப்பெடுத்தாடிய உதயசூரியன் 5 பந்துப் பரிமாற்ற முடிவில் 31 ஓட்டங்களுடன் அனைத்து விக்கெட்டுக்களையும் இழந்தது. வல்வை அணி சார்பில் தீபராஜ் 2  விக்கெட்டுக்களையும் றொசான் , ரஞ்சித் ஆகியோர் தலா 1 விக்கெட்டுக்களையும் கைப்பற்றினர். 32 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாட களமிறங்கிய வல்வை அணி 1 விக்கெட்டை இழந்து 4 விக்கெட்டுக்களால் வெற்றி பெற்றது, தீபராஜ் 25 ஓட்டங்களை அணிக்காக பெற்றுக் கொடுத்தார். 

 

இரண்டாவதாக நடைபெற்ற அரையிறுதி ஆட்டத்தில் பருத்தித்துறை வீனஸ் விளையாட்டுக் கழகத்துடன் வல்வை அணி மோதியது. முதலில் துடுப்பெடுத்தாடிய வீனஸ் அணி 5 பந்துப் பரிமாற்றமுடிவில் 1 விக்கெட் இழப்பிற்கு 74 ஓட்டங்களை பெற்றுக் கொண்டது, வல்வை அணி சார்பாக றோசான் 1 விக்கெட்டை வீழ்த்தினார். 75 ஓட்டங்களை வெற்றி இலக்காக கொண்டு பதிலுக்கு துடுப்பெடுத்தாடிய வல்வை அணி 5 பந்துப் பரிமாற்ற முடிவில் 64 ஓட்டங்களை மாத்திரம் எடுத்து தோல்வியைத் தழுவிக் கொண்டது. வல்வை அணிக்காக அதிக பட்சமாக தீபராஜ் 32 ம் ஜெகன் 21 ஓட்டங்களையும் பெற்றுக் கொடுத்தனர்.

 

பருத்தித்துறை பிரதேச மட்ட மென்பந்தாட்ட போட்டியின் இறுதி ஆட்டமானது நாளை காலை நெடியகாடு மைதானத்தில் நடைபெறவுள்ளது. இவ் இறுதிப் போட்டியில்  நெற்கொழு கழுகுகள் விளையாட்டுக் கழகத்தை எதிர்த்து பருத்தித்துறை வீனஸ் விளையாட்டுக் கழகம் மோதவுள்ளது.