வீழ்ச்சியடையும் பிறப்புவீதமும் , தாமதமாகும் திருமணங்களும் - யாழ்ப்பாணச் சமுதாயம் எதிர்நோக்கும் குடித்தொகையியல் ஆபத்து!

வீழ்ச்சியடையும்   பிறப்புவீதமும்  , தாமதமாகும் திருமணங்களும் - யாழ்ப்பாணச் சமுதாயம் எதிர்நோக்கும் குடித்தொகையியல் ஆபத்து!

2024 ஆம் ஆண்டு இலங்கைத் அரசாங்கத்தால் வெளியிடப்பட்ட குடிமதிப்பு மற்றும் வீட்டுவசதிப் புள்ளிவிவரங்கள் (Census of Population and Housing 2024), இலங்கையின் ஒட்டுமொத்தக் குடித்தொகையமைப்பில் ஏற்பட்டுள்ள பாரிய மாற்றங்களை வெளிப்படுத்தியுள்ளன. குறிப்பாக, பெண்களின் திருமண வயது தாமதமடைதல், மணம் முடிக்காமல் வாழும் பெண்களின் எண்ணிக்கை அதிகரிப்பு மற்றும் நாடளாவிய ரீதியில் அதிகரித்து வரும் விவாகரத்து வீதங்கள் ஆகியவை சமூக ஆர்வலர்கள் மற்றும் மருத்துவ நிபுணர்கள் மத்தியில் பெரும் அதிர்ச்சியை ஏற்படுத்தியுள்ளன. இம்மாற்றங்கள் ஒட்டுமொத்த நாட்டையும் பாதித்தாலும், வடமாகாணத்தை, குறிப்பாக யாழ்ப்பாணத் தமிழ்ச் சமுதாயத்தை மிக ஆழமாகப் பாதித்துள்ளது என்பது புள்ளிவிவர ஒப்பீடுகள் மூலம் தெளிவாகிறது.

1. புள்ளிவிவரங்கள் காட்டும் யதார்த்தம்: TFR மற்றும் TMFR ஒப்பீடு

2024 தரவுகளின்படி, இலங்கையின் ஒட்டுமொத்த மொத்தக் கருத்தரிப்பு வீதம் (Total Fertility Rate - TFR) 1.3 ஆகக் குறைவடைந்துள்ளது. அதாவது, ஒரு பெண் தன் வாழ்நாளில் பெறும் சராசரிப் பிள்ளைகளின் எண்ணிக்கை பிரதியீட்டு மட்டம் (Replacement Level) 2.1 ஐ விடக் குறைந்துள்ளது.

ஆனால், திருமணமான பெண்களின் கருத்தரிப்பு வீதத்தை (Total Marital Fertility Rate - TMFR) நோக்கும் போது அது தேசிய மட்டத்தில் 2.7 ஆகக் காணப்படுகிறது. யாழ்ப்பாண மாவட்டத்தில் இந்த முரண்பாடு இன்னும் உச்சமாக உள்ளது:
• யாழ்ப்பாணம் TMFR (திருமணம் முடித்த பெண்களின் கருத்தரிப்பு வீதம்): 3.4
• யாழ்ப்பாணம் TFR (அனைத்துப் பெண்களின் கருத்தரிப்பு வீதம்): 1.4

இதன் மூலம், யாழ்ப்பாணத்தில் திருமணமான தம்பதியினர் சராசரியாக 3 பிள்ளைகள் வரை பெறத் தயாராக இருந்தபோதிலும், ஒட்டுமொத்த கருத்தரிப்பு வீதம் 1.4 ஆகக் குறைவதற்குக் காரணம், இனப்பெருக்க வயதிலுள்ள பெண்களில் கிட்டத்தட்ட 59% வீதமானோர் திருமண பந்தத்திற்குள் இணையாமல் அல்லது தாமதமாக இணைவதே ஆகும்.

2. நாடளாவிய ரீதியில் அதிகரிக்கும் விவாகரத்துகளும், ஆண்களின் திருமணத் தாமதமும்

2024 குடிமதிப்புத் தரவுகளின்படி, முன்னெப்போதும் இல்லாதவாறு இலங்கையின் அனைத்து மாவட்டங்களிலும் விவாகரத்து மற்றும் முறையான பிரிவுகளின் (Divorce and Separation) வீதம் கணிசமாக உயர்ந்துள்ளது. குடும்ப வன்முறைகள், பொருளாதார அழுத்தங்கள் மற்றும் தம்பதிகளுக்கு இடையேயான புரிதலின்மை இதற்கு முதன்மைக் காரணங்களாக அம்கின்றன.

மறுபுறம், ஆண்களின் சராசரி திருமண வயதும் நாடளாவிய ரீதியில் 29.2 ஆக உயர்ந்துள்ளது. குறிப்பாக யாழ்ப்பாணத்தில் ஆண்களின் சராசரி திருமண வயது 30.8 ஆக, அதாவது கிட்டத்தட்ட 31 வயதாகப் பதிவாகியுள்ளது. இதுவே நாட்டின் மிக உயர்ந்த ஆண்களின் திருமண வயதாகும். குடும்பப் பொறுப்புகள், வேலைவாய்ப்பின்மை மற்றும் பொருளாதாரத் தளம்பல்களால் ஆண்கள் தங்கள் முப்பதுகளின் பின்னரே திருமணம் பற்றிச் சிந்திக்கத் தொடங்குகின்றனர்.

3. யாழ்ப்பாணச் சமுதாயத்தில் திருமணத் தாமதத்தை ஏற்படுத்தும் தனித்துவமான காரணிகள்

யாழ்ப்பாணத் தமிழ்ச் சமுதாயத்தில் பெண்களின் திருமணத் தாமதத்திற்கும், மணம் முடிக்காமைக்கும் பின்வரும் காரணிகள் மிக முக்கியப் பங்காற்றுகின்றன:

• பெண்களின் உயர் கல்வி மற்றும் தொழில்சார் இலக்குகள் (High Ambition in Education): யாழ் பெண்கள் கல்வியிலும் வேலைவாய்ப்பிலும் மிக உன்னதமான இலக்குகளைக் கொண்டுள்ளனர். பல்கலைக்கழகக் கல்வி மற்றும் உயர் பதவிகளை அடையும் நோக்கில் தங்களின் இருபதுகளின் பெரும் பகுதியைச் செலவிடுவதால், இயல்பாகவே திருமணம் முப்பதுகளை நெருங்குகிறது.

• சாதி, மதம் மற்றும் பிராந்தியக் கட்டுப்பாடுகள் (Caste, Religion, and Regionalism): நவீன காலத்திலும் யாழ் சமூகத்தில் சாதியக் கட்டமைப்புகளும், மதப் பின்னணிகளும், 'பூர்வீகப் பிராந்தியம்' (வளாலாய், பருத்தித்துறை, தீவகப் பகுதிகள் போன்ற பிராந்திய வேறுபாடுகள்) சார்ந்த பிடிவாதங்களும் தகுந்த மாப்பிள்ளை அமைவதைக் கடினமாக்குகின்றன.

• ஜாதக நம்பிக்கை மற்றும் பொருத்தங்கள் (Astrology and Chart Matching): ஜாதகப் பொருத்தப் பார்ப்புகள் காரணமாக நூற்றுக்கணக்கான நல்ல மாப்பிள்ளைகள்  ஆரம்பத்திலேயே நிராகரிக்கப்பட்டு, திருமண வயது கடந்துபோகின்றது.

• சீதனக் கொடுமையும் அரசியல் தலைமைகளின் மௌனமும் (Influence of Dowry): படித்த பெண்களாக இருந்தாலும், தகுதியான ஓர் ஆணுக்குப் பெரும் தொகைப் பணம், நகை அல்லது நிலபுலன்களைச் சீதனமாகக் கொடுக்க வேண்டிய சமூக அழுத்தம் இன்னும் தீவிரமாக நிலவுகிறது. அண்டை நாடான இந்தியாவில் 1961 ஆம் ஆண்டிலேயே வரதட்சணைத் தடைச் சட்டம் (Dowry Prohibition Act) கொண்டுவரப்பட்டு அது சட்டப்படி தடை செய்யப்பட்டுள்ள போதிலும், இலங்கையில் இதுவரை எந்தவொரு தமிழ் அரசியல் தலைமைகளும் இந்தச் சீதனக் கொடுமைக்கு எதிராகக் குரல் கொடுக்கவோ, அதனை எதிர்க்கவோ இல்லை என்பது கசப்பான உண்மையாகும். இலங்கையின் வடகிழக்கில் தமிழீழ விடுதலைப் புலிகளின் நிர்வாகக் காலப்பகுதியில் மாத்திரமே இந்தச் சீதன நடைமுறைக்கு எதிராகக் கடுமையான கட்டுப்பாடுகளும் எதிர்ப்புகளும் காட்டப்பட்டன. அதன் பின்னர், இக்கொடுமைக்கு எதிராக எவ்வித அரசியல் ரீதியான நகர்வுகளும் இல்லாததால், நடுத்தர மற்றும் ஏழைக் குடும்பத்துப் பெண்கள் இந்தச் சீதனப் பாரத்தைத் தாங்க முடியாமல் திருமணத்தையே தவிர்க்கும் நிலை தொடர்கிறது.

• புலம்பெயர் சமூகத்தின் வரவு (Diaspora Entrance in Marriage Market): புலம்பெயர்ந்து வாழும் தமிழர்கள் (Diaspora) யாழ்ப்பாணத் திருமணச் சந்தையில் ஏற்படுத்தும் தாக்கம் மற்றுமொரு காரணியாகும். வெளிநாட்டு மாப்பிள்ளைகளை எதிர்பார்ப்பதும், அதனால் உள்நாட்டு மாப்பிள்ளைகளை நிராகரிப்பதும், பின்னர் வெளிநாட்டு மாப்பிள்ளைகளில் ஏற்படும் ஏமாற்றங்கள் அல்லது விவாகரத்துகள் சமூகக் கட்டமைப்பைச் சிதைக்கின்றன.

4. பிறப்புவிகித வீழ்ச்சியும் ஆபத்தான விளைவுகளும்

கோவிட்-19 (COVID-19) பெருந்தொற்று ஏற்படுத்திய வடுக்கள் மற்றும் அதனைத் தொடர்ந்து இலங்கையில் ஏற்பட்ட மிக மோசமான பொருளாதார வீழ்ச்சி (Economic Downfall) ஆகியன மக்களின் வாழ்க்கைச் செலவை, குறிப்பாகக் குழந்தை வளர்ப்புச் செலவை விண்முட்டச் செய்துள்ளன. பால்மா விலை, கல்விச் செலவு மற்றும் மருத்துவச் செலவுகளுக்கு அஞ்சி, இளந்தம்பதியினர் குழந்தை பெற்றுக் கொள்வதைத் தவிர்க்கின்றனர் அல்லது ஒரு குழந்தையுடன் நிறுத்திக் கொள்கின்றனர்.

இதன் விளைவாக, யாழ்ப்பாணத் தமிழ்ச் சமூகம் மிக வேகமாக முதியவர்களைக் கொண்ட ஒரு சமூகமாக (Aging Population) மாறி வருகின்றது. இளையோர் தொகை சுருங்குவதும் முதியோர் தொகை அதிகரிப்பதும் எதிர்காலத்தில் சமூக, பொருளாதார மற்றும் கலாசார ரீதியாகப் பாரிய பின்னடைவுகளைத் தோற்றுவிக்கும்.

5. தேசிய மட்டத்திலான அரசியல் பலவீனம் மற்றும் சுயநிர்ணய உரிமைக்கான சவால்

இலங்கைத் தமிழர்களின் ஒட்டுமொத்தக் குடித்தொகைப் பரம்பலை (Population Distribution) நோக்கும் போது, இலங்கைத் தமிழர்களில் கிட்டத்தட்ட 50% வீதமானோர் யாழ்ப்பாண மாவட்டத்திலேயே வாழ்கின்றனர். எனவே, யாழ்ப்பாணத்தில் ஏற்படும் பிறப்புவீத வீழ்ச்சி என்பது வெறும் ஒரு மாவட்டத்தின் பிரச்சினை மட்டுமல்ல; அது ஒட்டுமொத்த இலங்கைத் தமிழ் இனத்தின் தேசிய விகிதாசாரத்தை நேரடியாகப் பாதிக்கும் ஒரு பேராபத்தாகும்.
இதற்கான உடனடித் தீர்வுகள் மற்றும் விழிப்புணர்வுத் திட்டங்கள் (Early Interventions) தற்போதே நடைமுறைப்படுத்தப்படாவிட்டால், இலங்கையின் ஒட்டுமொத்தக் குடித்தொகையில் இலங்கைத் தமிழர்களின் சதவீதப் பிரதிநிதித்துவம் மேலும் வீழ்ச்சியடையும். இந்தச் சமூகக் குடித்தொகைச் சுருக்கமானது, எதிர்காலத்தில் இலங்கைத் தமிழர்களின் தேசிய அரசியற் பலத்தைக் குறைப்பதுடன், சர்வதேச மற்றும் உள்நாட்டு அரங்கில் அவர்களது சுயநிர்ணய உரிமைக்கான (Self-Determination) நியாயமான கோரிக்கைகளையும், அரசியல் பேரம்பேசும் சக்தியையும் பலவீனப்படுத்திவிடும் என்பதில் எவ்வித ஐயமுமில்லை.

அவசரக் குரல் (Alarm Call)

யாழ்ப்பாணத் தமிழ்ச் சமுதாயம் இந்தக் குடித்தொகையியல் (Demographic) ஆபத்து குறித்து உடனடியாக விழிப்படைய வேண்டும்.

• சாதி, ஜாதகம், பிராந்திய வாதம் போன்ற காலாவதியான சமூகக் கட்டுப்பாடுகளைத் தளர்த்தி இளவயதுத் திருமணங்களை ஊக்குவிக்க வேண்டும்.

• தலைமைகளின் ஆதரவற்ற நிலையிலும், சமூக மட்டத்தில் சீதன ஒழிப்பு மற்றும் புலம்பெயர் மாப்பிள்ளைகள் மீதான அதீத மோகத்தைக் குறைக்க நாம் முன்வர வேண்டும்.

• இளந்தம்பதியினர் குழந்தை பெற்றுக் கொள்வதை ஊக்குவிக்கும் வகையில் சமூக மற்றும் குடும்ப ஆதரவுத் தளங்கள் உருவாக்கப்பட வேண்டும்.

இப்போதே விழிப்படையாவிட்டால், எதிர்காலத்தில் எமது பிராந்தியத்தில் எமது தனித்துவமான சமூகக் கட்டமைப்பும், எமக்கான அரசியல் பிரதிநிதித்துவமும் கேள்விக் குறியாகிவிடும் என்பதைப் பொதுமக்களும் சமூகப் பெரியார்களும் உணர வேண்டிய தருணமிது!

(பிரதி)
Dr முரளி வல்லிபுரநாதன்
MBBS (Jaffna), PGD (Population Studies), MSc (Colombo), MD (Community Medicine), FCCP (SL), FRSPH (UK)
(சமுதாய மருத்துவ நிபுணர் மற்றும் குடித்தொகையியல் ஆய்வாளர்)
28.5.2026