வைய முதல் மாந்தர் வருடம் பிறக்கிது தையினிலே.!

வைய முதல் மாந்தர் வருடம் பிறக்கிது தையினிலே.!

 

 

வையம் அசைந்து, அண்டமாளும் அந்த ஐயனைச் சுற்றியே, வந்து சேருது வல்லவர் புத்தாண்டு!

 

ஐயம் அனைத்துமே அந்த ஆதவன் தீயினில் வேகிக் கருகி, வீரம் விளைந்திட,

தாயின் தமிழ்மொழி ஆண்டாய், வந்து மலருது எங்கள் தமிழ் புத்தாண்டு!

 

தெய்வம் அனைத்துக்கும் தேவன் நீயேயென,

வெளிச்சம் நல்கும் அந்த வெய்யோனைப் பார்த்து,

சொன்ன மொழியானின் தேசம் எழுந்திட,

தேடிவருது கோடித் தமிழனின் கோலப் புத்தாண்டு!

 

வாழ்வின் தத்துவத்தை 

வரிகளில் கோலமிட்டு வையம் வியந்த எங்கள் வள்ளுவனார் ஆண்டாய்,

தையில் பூக்குது எங்கள் தமிழ் புத்தாண்டு!

 

தானைத் தலைவனும்,

அவன் சேனைப் படைகளும் அன்று பானைதனில் பொங்கலிட்டு பகலவனை வேண்டி நின்ற,

எங்கள் ஈழநிலம் 

மீள எழுந்திட,

வாழ்த்துகள் சொல்லியே வந்து பிறக்கிது செந்தமிழ் புத்தாண்டு!

 

ஆரியர் விதைத்ததையும்,

சோதிடர் சொன்னதையும்,

காதிலே போட்ட காலமதை மாற்றி,

ஞாலத் தமிழ் மாந்தர் கூடி அறிவித்த கூற்றை ஏற்று நின்று,

வைய முதல் மாந்தர் வருடம் 

தையிலே வந்ததென்று 

வாழ்த்துகள் நீ பாடு!

 

 ஆறுமுகம் ராஜ்குமார் (கனடா)