ஆதவன் பக்கம் 49 – ஆழிக்குமரன் ஆனந்தன் நீச்சல் தடாகம் -எப்படி நீந்தப் போகின்றோம்!

‘இது தவிர்க்கப் படவேண்டிய ஒரு முயற்சி’ என்றேன். ‘உங்கள் அக்காவின் இழப்புக்கும் கடந்த கால போர் ஒரு மறைமுக காரணம் தானே?, போரில் உயிர் இழந்தவர்களில் ஒருவராக உங்கள் அக்காவின் ஞாபகார்த்தமாகவும் குறித்த தூபி அமைவதை நீங்கள் விரும்பவில்லையா?....... எனப் போன்ற தன் பக்க வாதங்களை எனக்குக் கூறியதைப் போல்  மற்றவர்களுக்கும் கூறி வருகின்றார். ஊர்மக்கள் உட்பட்ட பலர் இதனை விரும்பவில்லை என்பதையும், இதனால் ஊர்மக்கள் மத்தியில் (குறிப்பாக புலம் பெயர் வல்வை வாசிகள்) தனது செல்வாக்கை இழந்து வருகின்றார் என்பதை அவர் அறியாதது அவரின் அறியாமையே.

 

வடக்கில் – யாழில் – வடமராட்சியில் – அதுவும் வல்வையில் - சர்வதே தரத்திலான ஒரு நீச்சல் தடாகம் சில தினங்களில் உத்தியோக பூர்வமாக திறக்கப்படவுள்ளது. வல்வை நகர்புறப் பகுதியில், சற்சதுர 4 பரப்பு வெற்றுக் காணி என்ற ஒன்றே இல்லாத நிலையில், சுமார் 20 பரப்பு நிலம் கையகப்படுத்தப்பட்டு நீச்சல் தடாகம் – அதுவும் சர்வதேச தரத்திலான நீச்சல் தடாகம் அமைகின்றது.

 

இலங்கை சுங்கத்துக்கு சொந்தமான பருத்தித்துறை, காங்கேசன்துறை மற்றும் ஊர்காவற்துறை போன்ற நிலங்கள் இன்றும் சுங்கத்துக்கு சொந்தமானவையாகவே விளங்குகின்ற நிலையில், வல்வையில் அமைந்திருந்த சுங்க நிலம் மாத்திரம் வல்வை நகரசபைக்கு சொந்தமாக கைமாற்றப்பட்டது. கிட்டத்தட்ட சாத்தியப் பட முடியாத விடயம் இது.

 

முன்னர் சுங்கக் காணி 

அதே நிலத்தில் இலங்கை அரசின் நிதியுதவியுடன் நீச்சல் தடாகம் ஒன்று சாத்தியம் ஆகின்றது. இந்த வரி...... அந்த வரி..... என நாங்கள் வாங்கும் பொருட்களில் போடப்பட்டுள்ள வரிகளின் படி பார்த்தால் நான் இதுவரை அரசுக்கு குத்து மதிப்பாக மறைமுகமாக செலுத்தியுள்ள சுமார் 1 கோடி ரூபாவின் ஒரு பகுதியாவது ஊருக்கு வந்துள்ளது என்ற சிறிய சந்தோஷம் எனக்கு. (இலங்கை அரசிடம் / அமைச்சர்களிடம் கையேந்தக் கூடாது என்பவர்களுக்கு இந்த விடயம் சமர்ப்பணம்) 

 

இவ்வாறானதொரு நீச்சல் தடாகத்தை சாத்தியம் ஆக்கியவர் என்றால் – அது சிவாஜிலிங்கம் தான். நிலம் கையகப்படுத்தல், அரசின் அனுமதி, அமைச்சர்களிடம் இருந்து நிதி. பிரதேச மக்கள் சிலரின் மறைமுக எதிர்ப்பு, மேலாக மேதாவிகள் ஒரு சிலரின் ‘புட்டிசம்’ கள் .............. என பல தடைகளை தாண்ட முன்னின்றவர் சிவாஜிலிங்கம். சிவாஜிலிங்கம் தான் ‘முழுதும்’ என்று நான் கூறவில்லை.

 

நீச்சல் தடாகத்துக்கு அடிக்கல் போட்ட போது, ‘இது மங்கள சமரவீரவினால் முன்னெடுக்கப்பட்ட ஒரு முழு முயற்சி என்று FB இல் போட்டார் ஒருவர். ‘நீங்கள் இதுவரை குழப்பியது போதும், இதையும் தயவு செய்து குழப்பிவிடாதீர்கள்’ என்று Comment அடித்திருந்தான் ஒரு இளைஞன். 

 

எனது இந்தப் பக்கத்தின் பிரதான நோக்கம் மேற்குறிப்பிட்ட விடயங்கள் அன்று, மாறாக நீச்சல் தடாகம் எதிர்கொள்ளவுள்ள பிரச்சனைகள் பற்றியது தான்.

 

பராமரிப்புக்கான தகுந்த ஊழியர்கள், பராமரிப்பு செலவு, பயன்பாடு, கடலுக்கு அண்மையில் அமைந்துள்ளமை என சில இடர்கள் வரக்கூடும், இவை இயல்பானவை மற்றும் ஏற்கக்கொள்ளக்கூடியவை.

 

இவைகளுக்கு மேலாக தலை தூக்கவுள்ள பிரச்சனை நீர்ப் பிரச்சனைதான்.   நீச்சல் தடாகதுக்கு 7 லட்சம் லீட்டர் நன்னீர் தேவை என மதிப்பிடப்பட்டுள்ளது. ஆரம்ப இறைப்புக்குத் தேவையான நீர் கூட, வடமராட்சி வடக்கில் இல்லை என்பது ஒரு வியக்க வைக்கும் விடயம். வடமராட்சி வடக்குக்கு சமமான நிலப்பகுதிகளைக் கொண்ட பெரிய நகர்கள் பலவற்றில் லட்சக் கணக்கான குடி  மக்களின் நீர்த் தேவையை பூர்த்தி செய்து நூற்றுக் கணக்கான நீச்சல் தடாகங்களுக்கு நீர் வசதி செய்து கொடுக்கின்றார்கள்.

 

இங்கு ஒரே ஒரு நீச்சல் தடாகத்துக்கு நீருக்கு தட்டுப்பாடு. 

 

நிலாவரை மற்றும் வடமராட்சி கிழக்கின் நீர்ப் படுக்கைகளில் இருந்து முதற் கட்டத்துக்கு நீரைப் பெற முயற்சி எடுக்கப்பட்டுள்ளது. இது ‘இரணைமடு – யாழ்பாணம்’ மாதிரி அடுத்துக் கட்டங்களுக்கு நகராது.

 

முதற் கட்ட நீரை மேற்குறிப்பிட்ட இடங்களில் இருந்து எடுத்து, பின்னர் இருக்கும் நீரை சுத்தி கரித்துக் கொண்டு, அதற்குப் பின்னர் தேவைப்படும் நீரை ‘நன்னீர் பிறப்பாக்கி’ (Fresh Water Generator) மூலம் பூர்த்தி செய்யலாம் என்கின்றார்கள் சம்பந்தப்பட்டவர்கள். ஆகவே எதிர்வரும் காலங்களில் நன்னீர் பிறப்பாக்கியே இந்த நீச்சல் தடாகத்தின் உயிர்நாடியாக விளங்கவுள்ளது.

 

ஆவியாகும் நீர், குளித்தல், குடித்தல் எனப் போன்ற பல தேவைகளுக்கு பெருமளவு நீர் தேவைப்படவுள்ளது. இதைவிட சுத்திகரிப்பு சுதப்பும் போதோ அல்லது டெங்கு முட்டை உள்ளது என்றோ முழுமையாகக் கூட, நீர் மாற்றப் படவேண்டி வரலாம்.

 

யாழில் இதுவரை நன்னீர் பிறப்பாக்கிகள் மூலம் நன்னீர் எங்கும் பெறப்படவில்லை. இந்த முயற்சிக்கான சில முஸ்தீபுகள் முன்னர் மேற்கொள்ளப்பட்டிருந்தன. ஆனால் கை கூடவில்லை.

 

நன்னீர் பிறப்பாக்கி மூலம் கடல் நீரை சுத்தி கரிப்பது பல இடங்களில் – மழைத்துளி விழாத இடங்களில் - இடம்பெற்றுவரும் ஒன்று தான். கடந்த 26 வருடங்களில் நான் அதிகம் பாவித்துள்ளது இவ்வாறு பெறப்பட்ட நீர் தான் (கப்பல் வாழ்க்கையில்). 

 

ஆனாலும் இங்கு இத்தகைய முறை ஒன்றின் மூலம் கடல்நீரை மாற்றி நன்னீரை  பெறுவது என்பது எவ்வளவு சாத்தியப்படப்போகின்றது என்பதை பொறுத்திருந்துதான் பார்க்கவேண்டும். குறித்த பிறப்பாக்கியை பயன்படுத்தக்கூடிய தொழில் நுட்பம், பராமரிப்பு, உதிரிப் பாகங்கள் பெறுவது போன்று பல சிக்கல்கள் இதில் உண்டு. .இவற்றை விட வேறு ஒரு சிக்கலும் எதிர்காலத்தில் வரக்கூடும் – அதைப்பற்றி நான் இங்கு எழுதவிரும்பவில்லை. 

 

‘தூரத்தில போற பிள்ளையிந்த முகத்தில் இருக்கும் பருவைக் கூட துல்லியமாக படம் பிடிக்கமுடியும் என்று சிங்கபூர் முஸ்தபா சென்டரில் விற்பனையாளர் ஒருவர் கூற, அவசரக்  கோளாறில் ஒரு காமராவை வாங்கி – இன்று அதற்கு ஒரு பட்டரி வாங்க யப்பானில் கூட முயற்சித்து கை விட்டுவிட்டேன்.  

 

நீர்ப் பிறப்பாக்கிக்கு எதிர்காலத்தில் உதிரிப் பாகம் எடுப்பது என்பது ஒரு இலகுவான விடயம் அல்ல. (புதுசை வாங்க வேண்டியது தான்) 

 

தற்பொழுது நீச்சல் தடாகம் 

நீர்ப் பிறப்பாக்கி விடயத்தைப் பொறுத்தவரை ஒரே ஒரு சாதகம் – வல்வையில் பல கப்பற்கார பொறியியலாளர்கள் குறித்த உபகரணத்தை கையாளக்கூடியவர்கள் என்பது தான், திருத்துவது உட்பட. 

 

நீச்சல் தடாகத்துக்கு தேவையான நீரை, தொடர்ந்து தடங்கல்கள் இன்றி பெறுவது பற்றி  சரியான ஒரு திட்டவரைபு (Assessment) தயாரிக்கப்படவில்லை.

 

மழை காலங்களில் 'வெள்ளம்' என்றும் கோடை காலங்களில் 'தண்ணீர்' என்றும் ஒவ்வொரு ஆறு மாதமும் – முன்னுக்கு நடந்ததையும் பின்னுக்கு நடக்கப் போவதையும் மறந்து – காலச் சக்கரத்தில் ஓடும் நாங்கள், நீச்சல் தடாகத்து தண்ணீர் தேவை பற்றியும் பெரிதாக அலட்டிக்கொள்ளப்போவதில்லை. ஆனாலும் நீச்சல் தடாகம் நீர்ப் பிரச்சனையால் சில காலங்களுக்காவது திண்டாடும் என்பது திண்ணம். இதுவே இப்பிரதேசத்தின் நீர்ப் பிரச்சனை பற்றி எதிர்காலத்தில் ஒரு புரிதலைக் கொடுக்கக்கூடும்.

 

‘பனை மரத்தை பற்றிக் கூறுகின்றேன் வா' என்று கூட்டிக்கொண்டு போய், ‘பனை மரத்தில் கட்டியிருந்த மாட்டைப் பற்றி கூறுகின்றான்’ என்று நீங்களே கூறாமல் – மாட்டைப் பற்றியும் ஒரு பதிவை இங்கு இடுகின்றேன்.

 

அண்மையில் தென் ஆபிரிக்காவின் கேப்டவுன் போன பொழுது, பைலட் கூறியிருந்தார் ‘வீட்டில் வளர்க்கும் மரங்களுக்கு நீர் இடுவதை நிறுத்துமாறு அரசு கட்டளை பிறப்பித்துள்ளது' என்று. 

 

யாழைப் பொறுத்தவரை வருடந்தோறும் சுமார் 1200 மில்லி மீட்டர் மழை வீழ்ச்சியை பெறுகின்றது. மக்கள் தொகை வெறும் சில லட்சங்கள்தான். ஓரளவு பசுமை வேறு. ஆனாலும் நீர்த் தட்டுப்பாடு. யாழின் நீர்த் தட்டுப்பாடும் – இதனை இங்குள்ளவர்கள் புரியாத் தவறி வருவதும் எனக்கு இன்றும் வியப்பைக் கொடுத்து வருகின்றது.

 

இன்று அரச ஊடகத்தில் வந்த செய்தி - வடக்கில் கடும் வறட்சி – பாதிக்கப்பட்டவர்களுக்கு குடிநீர் விநியோகம் (https://tamil.news.lk/news/political-current-affairs/item/30281-2019-06-24-08-42-01)

 

‘தமது சொந்த மக்களுக்கு ஏற்படுத்தப்பட்ட நல்ல திட்டம் ஒன்றை, உலகில் தடுத்தவர்கள் என்றால் அது தமிழ் தேசிய கூட்டமைப்பினர் தான்’ என்று ஆதங்கப்பட்டிருந்தார் ஒரு சிங்கள பாராளுமன்ற உறுப்பினர். நான் கூட இவ்வாறுதான் யோசித்து இருந்தேன். 

 

'மகாவலித் திட்டம் என்று எமது நிலத்தைப் பிடித்து விடுவார்கள்' என்றார்கள். சரி நன்னீர் திட்டத்துக்கு என்ன மாற்று வழி செய்துள்ளார்கள் அல்லது குறைந்த படசம் கூறியுள்ளார்கள். 

 

மாரி மழையால் தப்பித்து வருகின்றோம். உலக காலநிலை மாற்றத்தால் இரண்டு வருடம் வடக்கில் மழை பெய்யத் தவறினால், மகாவலி நீர் வேண்டும் என்று கூப்பாடு போட்டாலும் ஆச்சரியப்படுவதற்கு இல்லை. 

 

வடக்கு மகாவலித் திட்டம் போன்று கூட்டமைப்பினர் குழப்பிய இன்னொமொரு நல்ல விடயங்களில் ஒன்று சுண்டிக்குளம் சரணாலயத்தை விரிவுபடுத்த அரசு மேற்கொண்ட முயற்சியை (ரணில் இங்கு வந்தபோது  கூறி) நிறுத்தியது தான். 

 

எது எப்படி என்றாலும் இங்கு அனைவருக்குமென ஒரு நீச்சல் தடாகம் ஒன்று அமைவது ஒரு வரப்பிரசாதம் என்பதில் ஐயமில்லை. எதிர்வரும் பிரச்சனைகளை எதிர்கொண்டு இதனை ஒரு வெற்றிகாரமான திட்டமாக்க அனைவரும் பாடுபடவேண்டும்.